ومعانا واحد من الصيادلة في مصر

من طرف Admin الأربعاء أبريل 27, 2011 3:23 am

ومعانا واحد من الصيادلة في مصر

الدكتور / ذكريا الحبونى .... اهلا بيك يادكتور

- اهلا وسهلا ياحبيبي .. ان شا الله يخليهملك
- ياتري يادكتور نقدر نسمع منك كلمة عن الصيدلي والصيدلة بوجه عام ؟؟؟؟؟؟؟؟؟؟
بحكم اني صيدلي ..... بنصح حبايبي اللي ناويين يدخلوها انهم يراجعوا نفسهم

لو مش بيحبوا الصيدلة ياريت مايدخلوهاش .......
لو مش هيستحملوا معاملة الناس ياريت مايدخلوهاش .......

المذيع : يعني ايه طالب في كلية صيدلة ؟؟؟؟؟؟؟؟؟؟؟؟؟؟؟؟؟

كثرت الاقوال في الموضوع ده :
في ناس (منهم لله ) كانوا بيقولوا ان اصعب سنتين في عمرك هما الثانوية ... بعد كدة هتعيش في اللمون ... وهتبقي الكلية دي ايه .. ياسلاااااااااااااااااام
وفي ناس قالوا ان الكليات اللي زي صيدلة ماتفرقش كتير عن ثانوي عام من حيث ضغط المذاكرة ( وماصدقتهمش الا لما دخلت )

المذيع : طيب ايه شروط القبول بكلية الصيدلة ؟؟؟؟؟؟؟؟؟؟؟؟؟؟

1- انك تكون حفيظ درجة اولي .. يعني هارد بشري ماشي في الشارع
2- اللي الدكتور يقوله هوا ده الصح .. واياك تختلف معاه ( ده هو اللي هيحطلك الامتحان ... وهيحط عليك لو محلتش زي ماقالك ) .
3- تجهز قرض من البنك عشان تشتري الكتب والملازم اللي هتحتاجهم... ودروس اذا لزك الامر ( واطمنك ... هيلزم الامر )
4- من قبل ماتدخل الكلية باسبوع .. تكون حاجز مع دكتور ضغط ودكتور نظر ودكتور انف واذن وحنجرة وجلدية وتناسلية
ونقف عند النقطة دي شوية :
دكتور الضغط والقلب : هيديك علاج وقائي لاي ذبحات صدرية او انخفاض او ارتفاع في الضغط نتيجة للامتحانات اللي ملهاش حل ولا نموذج اجابة .... وبرضه عشان الفلوس اللي هتدفعها
دكتور انف واذن : عشان وانت في المعمل لازم تبقي عارف من قبلها انك هتفقد حاجة اسمها الشم وحاجة اسمها الجيوب الانفية
دكتور الجلدية : عشان لو لاقدر الله وانت في المعمل وقع عليك ماية نار ولا حمض مركز تبقي عامل حسابك
دكتور التناسلية : عشان في احتمال كبير يجيلك عقم بسبب المواد الكيميائية ( ربنا يسترها علينا )
5- لازم ينسي الهرج والمرج بتاع الخروجات والكلام ده والا هينسي انه يتخرج من الكلية
المذيع : طيب ربنا وفقه ودخل الكلية ... ايه النصايح اللي تقولها لابنائك الصيادلة الجدد ؟؟؟؟؟؟؟؟؟؟؟؟؟؟؟؟؟؟

1- اول لما تدخل الكلية .. تسال عن اقرب منفذ لبيع الملازم والمذكرات عشان ابقي تف علي وشي ان فهمت حاجة من الكتب بتاعت الدكاترة ...تقولي طب انا هفهم منها ... اقولك نصيحة من اخ اكبر بلاش تعتمد علي الكتاب كمصدر مذاكرة ... هتخش الامتحان مش هتفتكر من الكتاب الا اول صفحة واخر صفحة اللي هما جلدتين الكتاب ... المحتوي بقي ..عبارة عن بلوظة في مخك
2- متحاولش تشغل مخك كتير في العلم اللي هما بيدوهولك ..... ( شغلها برة الكلية براحتك ) ... انما جوه المدرج السمع والطاعة وعدم الاسئلة الكتيرة عشان ماتبقاش تحت قول الله ( لاتسالوا عن اشياء ان تبد لكم تسؤكم )
3- ياريت اما تلاقي جزء غلس في المنهج ومش فاهمه لا من هنا ولا من هناك ... سيبه وركز في غيره ... لانك لو ذاكرته وانت مش فاهمه هتضيع وقتك ومش هتستفاد حاجة وهتخسر درجاتها في الامتحان ....... وان ماذاكرتوش يبقي كسبت وقتك في حاجة تانية وبرضه هتضيع درجاتها في الامتحان
4- ياريت وانت خارج من الامتحان ماتراجعش مع زمايلك الحل ... عشان غالبا كلكم بتطلعوا غلط ... وهيجيلكم حالة من الاحباط لو لقيت حاجة غلط عندك وهتاثر علي المادة اللي بعدها ( وبيني وبينك حتي لو حليت صح المادة اللي بعدها هتتاثر برضه )
5- ياريت تنزل تدرب في اي صيدلية جنبكم كل اجازة عشان اللي انت بتتعلمه حاجة والحياة العملية حاجة تانية خاااااااااااااااااااااالص
6- اياك والغش .....( مش عشان حرام ) بس عشان كلنا سواسية في الكلية ومستوي فهمنا للشئ واحد .. فغشيت ماغشيتش نتيجتك واحدة ياحبيب قلبي ... فخليها بجميلة وماتغشش

المذيع : طيب اتخرج من صيدلة .... شغله هيبقي ازاي ؟؟؟؟؟؟؟؟؟؟؟؟؟؟؟؟؟؟؟

1- بص ياروحي منك ليه .. شغلك عادة في البداية حاجتين :
ياميديكال ريب : او زي مابسميه ( مندوب مبيعات طبي ) ودي ...... شغلانة خلقها ربنا للصيدلي ( ضع مكان النقط مايناسبها من الكلمات )
ياصيدلي في صيدلية او مستشفي : وخصوصا التعامل مع الناس في كلا الحالتين صعب ومش سهل

نتكلم عن صيدلي المستشفي لو في صيدلية خارجي ( يعني بتتعامل مع البشر ) زي حالاتنا كدة :

كنت زمان فاهم ان الغباء ليه حدود ... وان في حاجة اسمها بديهيات لازم كل انسان يبقي عارفها
اقولك اوعي تحط القانون ده في دماغك والا هتتعب اوي واحتمال تسيب المهنة خالص .... لييييييييييييييييييه ؟؟؟؟؟؟؟؟؟؟؟؟؟

- هيجيلك كائن حي بسيط وحيد الخلية وحتي الخلية من غير نواه .. هتقوله :
ياحاج العلاج ده بعد فطار وعشا
هيرد عليك ويقولك : يعني كام مرة ؟؟؟؟؟؟؟؟؟

- هيجيلك كائن حي بسيط من غير خليه .... هتقولها :
ياستي العلاج ده قبل ماتنامي
هترد عليك وتقولك .. يعني 3 مرات ؟؟؟؟؟؟؟؟؟؟

- هيجيلك مخلوق هلامي ... هتقوله :
ياستي الدهان ده صبح وبالليل
هترد عليك و تقولك : قبل الاكل ولا بعده

- هيجيلك مخلوق خرافي .. هتقوله :
ياحاج العلاج ده عند اللزوم
هيرد عليك ويقولك يعني قبل اللزوم ولا بعد اللزوم ( والكلام ده حصل معانا شخصيا )

- هتجيلك كائنات فضائية تديك الروشتة وهي اصلا لسه مكشفتش .. فطبعا فاضية .. وهتقولك :
اصرفلي الروشتة يابني ...... هتقوم انت باصصلها من فوق لتحت وتقولها .. روحي اكشفي ياحاجة
هترد عليك رد يمكن يجيبلك انهيار .... طب اكشف ايه ؟؟؟؟؟؟؟؟؟
هترد تقولها بكل ادب : وانا مال امي ؟؟؟؟؟ هو مين اللي عيان ياولية ؟؟؟؟؟؟؟

- وهتجيلك كائنات رخوية مهلهله ..... بعد ماصرفت الروشتة .. تقولك :
والنبي غيرلي ده بفيتامين عشان يخف عليه
تقوم انت بكل احترام : قالع اللي في رجلك وتسيب الصيدلية وتطلع تجري وراها لغاية ماتشيلها الترهلات خالص

- هيجيلك كائن عجيب يقولك ..
انا عايز علاجي
انت بقي ترد بالشكل اللي انت عايزه .. مش هقولك انت تعمل ايه

صفات الصيدلي الشاطر في الصيدلية :
1- صبور لدرجة البرود
2- يكون معلم ودماغه توزن بلد
3- يعرف يتعامل مع كل الكائنات اللي ذكرتها فوق
4- يعرف انه في كل لحظة معرض للموت بسبب افعال الناس فيه ( وعادة بيموت مفروس )
5- غتت ورخم ويقدر يرد علي اي حد ويوقفه عند حده
6- يقدر ينزل لمستوي الطبقة المعدمة ويطلع للطبقة الراقية
7- يفضل يذاكر طول عمره
طيب ياتري الصيدلي في عيون الناس عبارة عن ايه ؟؟؟؟؟؟؟؟؟؟؟؟؟

المذيع : نجاوب علي السؤال ده في الحلقة اللي جايه ان شاء الله